Kudo nëpër atdhe, rrëshkitjet, shembjet dhe erozioni ekstrem po eliminojnë mijëra ton tokë. Liqenet po mbushen. Lumenjtë po ndoten. Po zhduken brigje, ishuj, histori. Fermerët po varfërohen, ndërsa toka po rrënohet me ritme alarmante. Largimi i dheut është i përhershëm dhe pasojat, të pazëvendësueshme!
Elementi i pestë dokumentoi këtë tragjedi kombëtare përmes episodit të gjashtë, me titull: “Udhëtim në zbrazëti!
“Elementi i pestë” është një përpjekje për të raportuar mbi rreziqet që u kanosen burimeve natyrore, pasurisë tonë të
përbashkët dhe të përhershme.
Përgjatë periudhave, njerëzimi veçoi katër elementë thelbësorë për jetën: toka, uji, ajri dhe zjarri! Ky përcaktim i prezantuar për herë të parë prej materialistit paradarvinist Empedokli në Greqinë Antike, u zhvillua më tej prej Aristotelit, i cili e pasuroi me një element e koncept të ri: vetëdija. Ishte pikërisht vetëdija, ky element jomaterialist që i jepte bashkësisë kozmike, formën e saj të plotë. Kështu pra, “Elementi i pestë” mishëron dhe bashkon vullnetin hyjnor, në themel të të cilit qëndron Natyra, vetë jeta në tërësinë e saj, në qendër të të cilës qëndron e vetmja qënie e vetëdijshme: Njeriu. Ndaj dhe kemi synuar që në prezantimin grafik, përmes logos, të përfshijmë simbolikisht të pestë këta elementë.
